أوبريت ” كلام العيون . حدوتة مصرية “. تأليف صلاح هاشم مصطفى
كلام العيون . حدوتة مصرية
( 1 )
نهر الزمان
الراوي :
كان فيه مرة واحدة بتحبل تجيب عيال.
بس مش اي واحدة، بس مش كل العيال.
بس مصر واحدة تحبل، تجيب زين العيال.
في محيط الصحراء،
تطفو القافلة،
في صحراء الخلود.
تمر كالأثير، على صفحة الرمال،
تترك آثارا لا تراها أعين،
إلا عيون ترى،
عيون ترى هذا النهر الخالد
يانيل .
يقولون أنه نهر الزمان،
فما حقيقة هذا النهر ؟
هل هو خيال ؟..
أناس تعيش مجروفة بتيار النهر،
وآخرون .. على ضفافه هائمون،
وآخرون ..يسبحون الى أعلى
إلى أعلى،
وفي قلوبهم، يحملون
الحب الأبدي للحياة،
للكينونة الكليّةـ
الأبدية،
على أرض الزمان،
في محيط الكون اللانهائي،
الرحمن علم القرآن.
يارب السفينة،
أضييء لنا الطريق.. يا الله.
( 2 )
الزفّة
الراوي :
كان فيه مرة واحدة بتحبل، تجيب عيال،
بس مش أي واحدة،
بس مش كل العيال .
كان فيه مرة شمس ، بتطلع من الشمس،
بتطلع من الشرق،
كان فيه مرة بلد،
وبلاد الله لخلق الله، واسعة،
وإسعى،
وإسعى ياعبد وأنا أسعى معاك
الكورس :
يعني بلاد الله، لخلق الله ، مش لولاد الكلب
الكفرة الظلَمة،
الراوي :
وأرض الله، بتولد عيال،
بس مش كل العيال، في أرض الله .
الكورس :
عيال في بلد،
بلد في شمس،
وشمس في بلد،
في بلاد النور،
بلاد الخلق،
باب الخلق.
الراوي :
كان فيه مرة واحدة بتحبل تجيب عِيال،
بس مش أي واحدة،
بس مش كل العيال،
مصر واحدة، بس مش أي واحدة بتحبل تجيب عيال،
بس مصر تحبل،
تجيب زين العيال.
الكورس يردد بشكل جماعي وبصوت قوي:
بس مصر تحبل تجيب زين العيال.
الراوي :
كان فيه مرة نخل،
كان.. يا ما كان ، نبي مِعدّي ع المكان،
كاين نيل،
ونيل في بلد،
وشمس في بلد،
ونيل في شمس.
نيلك عَالم يا مصر،
نيلك عالِم يا مصر،
عّالِم بالأحوال،
نيلك عامل يا مصر،
وفلاح.. يروي أرضك،
وروح ولادك.
نيلك يامصر..
مراكبي في مراكب شمس.
أي شمس ؟
كل شمس ،
في أي بلد،
من بلاد الله،
وبلاد الله ..لخلق الله
واسعة،
إسعى.
الراوي :
يا عالم زي الشهد يامصر،
عدى بلبل ع الصحبة في البستان،
حامل رسالة.
في الرسالة رسالة،
رسالة مطوية، ومتعطرة، بعطر الزعفران،
والمسك والعنبر
من روايح الجنة.
رسالة مكتوبة بنجوم العرش،
مرسومة بقلوب العشاق،
يامصر.
الكورس:
إسمك أخضر يامصر،
إسمك خَضَار يا مصر،
يامصر مش أي واحدة،
وعيالك زين العيال،
بأحبك يامصر
( يتبع )
بقلم
صلاح هاشم مصطفى
صلاح هاشم مصطفى كاتب وناقد ومخرج سينمائي مصري مقيم في باريس.فرنسا، وهو مؤسس ورئيس تحرير موقع “سينما إيزيس ” أول موقع سينمائي مصري احترافي مستقل على شبكة الإنترنت عام 2005، ومخرج عدة افلام وثائقية من ضمنها فيلم ” كلام العيون. حدوتة مصرية ” – رسومات بريشة محمد توفيق و تصوير سمير محمود – الذي عرض في جامعة فانسان الشهيرة في باريس.فرنسا يوم 5 يونيو 1976
